વિરહિણી ગીતકાવ્ય

વિરહિણી ગીતકાવ્ય 

ચૈતર ચંપો મ્હોરિયો ,

ને  મ્હોરી આંબા ડાળ ,

મઘમઘ મ્હોર્યા મોગરા ,

મેં ગૂંથી ફૂલન માળ ,

જુઈ ઝળૂંબી માંડવે ,

ને બાગે બાગે ફાલ ,

તું ક્યાં છો વેરી વાલમા ?

મને મૂકી અંતરિયાળ !

આ ચૈતર જેવી ચાંદની ,

ને  માણ્યા જેવી રાત ,

ગામતરાં તને શેં ગમે ?

તું પાછો વળ ગુજરાત .

કોયલ કૂંજે કુંજમાં 

ને રેલે પંચમ સૂર ,

વાગે વનવન વાંસળી ,

મારું પલ પલ વીંધે ઉર .

અવળું ઓંઢ્યું ઓઢણું ,

ને મારા છુટ્ટા ઉડે કેશ ,

શું કરું નિર્દય કંથડા !

મને વાગે મારગ ઠેસ .

જોબનને આ ધૂપિયે ,

પ્રીત જલે લોબાન ,

રાત આવી રળિયામણી ,

મારાં કોણ પ્રીછે અરમાન ?

સમજી જાજે સાનમાં ,

મન બાંધી લેજે તોલ ,

હોય ઈશારા હેતના .

એના ના કંઈ વગડે ઢોલ .

 બાલમુકુંદ દવે